top of page
Aur yw Popeth Disglair
Dyma ddechrau gwych i'r haf a'r holl dripiau yn y car - cân newydd sbon i'w ychwanegu i'r rhestr chwarae!
Byddi di'n siŵr o fod wedi dod ar draws Popeth, neu Ynys Roberts, wrth ymweld â gwyliau mwyaf y wlad. O'r Eisteddfod i Tafwyl, mae tiwns i'w fwynhau ym mhobman! Os nad 'da chi'n gyfarwydd gyda Popeth, mae un peth sy'n arbennig amdano. Hynny yw, dydi o prin byth ar ben ei hun!
Efallai y byddwch chi'n cofio darllen am Popeth yn cydweithio gyda Martha Grug a Local Rainbow ar wefan Lysh sbel yn ôl. Mae'r DJ bellach wedi mynd ymlaen i ychwanegu mwy o leisiau i'w draciau, gan gynnwys Sara Owen! Nawr, llais Hanna Seirian sy'n serennu ar y traciau diweddaraf.
Wythnos diwethaf, rhyddhawyd albwm newydd, sef Disglair. Mae'r albwm yn cynnwys traciau eiconig Popeth, fel Celwydd a Diva. I ddweud y gwir, does dim rhaid i chi gydlynu rhestr chwarae ar gyfer taith hir yn y car neu i'w fwynhau ger glan y môr - mae'r albwm yma yn barod i chdi gyda'r holl vibes y byddwch chi angen!
Ar y traciau mwyaf diweddar sydd ar yr albwm mae llais arbennig Hanna Seirian o Flaenau Ffestiniog. Hi sydd yn canu 'Rebel Heb Achos' a 'Melys', heb anghofio ei chyfraniad fel llais cefndir ar y gân 'Gad Iddi Fynd'.
Mae'n bosib nad dyma'r tro cyntaf i chi ei chlywed! Roedd Hanna ar dîm Bronwen Lewis (ar ôl i'r beirniaid i gyd troi eu cadeiriau i geisio ei bachu!) ar gyfres gyntaf Y Llais ac mae hi eisoes wedi rhyddhau trac ei hun - er mae naws traciau Popeth yn fwy, wel, pop!
“Fyswn i’n disgrifio fy steil gerddorol fel indie-pop ballads,” meddai. “Cyn i mi weithio hefo Ynyr, do’n i erioed wedi canu ar drac synth-pop o’r blaen felly roedd o’n rhywbeth newydd a chyffrous! Mae o wedi bod mor lyfli cydweithio hefo rhywun am y tro cyntaf yn gwneud rhywbeth mor wahanol i’r arfer (a bob amser neis gweithio hefo gog arall!). Fel arfer mae 'ngherddoriaeth i yn eithaf emosiynol felly mae cael cydweithio hefo Ynyr yn siawns i fi gael canu ar drac hwyl a bywiog. Mae’n gyferbyniad da - i grio gwrandwch ar ‘Cysur’, i ddawnsio gwrandwch ar ‘Melys’!”
Er bod eu steiliau mor wahanol, mae gan Hanna ac Ynyr un peth yn debyg, sef adnabod pwysigrwydd cydweithio mewn maes creadigol. “Mae cydweithio yn holl bwysig i greu cerddoriaeth yn sicr,” eglurai. “Pan ti’n meddwl am gerddorfa mae angen i bob un chwarae’u rhan a dwi jest yn falch cael rhoi fy llais i chwarae’r rhan yma!”
Y tu hwnt i brosiectau Popeth, mae yna lu o artistiaid eraill wedi ysbrydoli Hanna ar ei thaith gerddorol. “O ran ysbrydoliaeth i fi, mae fy mlas i yn eithaf eang, o fiwsig Cymraeg fel Buddug achos o naws ei chaneuon hi,” dywedai. “Dwi’n rili hoff o Ffatri Jam hefyd, yn enwedig ‘Dal dy Afael’, ond fel rhywun sy’n dod o Blaenau mae’n rhaid rhoi mensh i Anweledig ac i Yws Gwynedd. Maen nhw’n esiampl o bobl o’r ardal sydd ‘di fy ysbrydoli i allu mynd amdani.”
“Fydda i’n chwarae yn Sesiwn Fawr hefo Popeth ar yr 18fed o Orffennaf ac mae hynny’n gyffrous i wneud am y tro cyntaf. Dwi’n gobeithio gallu mynd yn ôl i’r stiwdio i allu cynhyrchu mwy o ganeuon newydd yn fuan felly gwyliwch y gofod!”
bottom of page