top of page
Sophia ac Astrid
Haia. Sophia ydw i a dwi’n 18 mlwydd oed. Dwi yn fy mlwyddyn gyntaf o’r brifysgol yn astudio ffisiotherapi. Dwi’n joio pob math o bethau ac nid yw fy stoma yn stopio fi rhag gwneud y pethau yr wyf yn eu mwynhau!
Ges i ddiagnosis o Ulcerative Colitis pan o'n i’n 17 ar ôl bod yn yr ysbyty am beth amser. Rhoddon nhw gyffuriau i mi a weithiodd hynny am dipyn. Mae ulcerative colitis yn glefyd cronig sydd yn effeithio eich coluddyn mawr ac mae’r corff, basically, yn ymosod ar ei hunan - bach yn rubbish! Mae’n achosi loads o boen, blinder, colli pwysau a’r angen i fynd i’r tŷ bach drwy’r amser.
Tua thri mis yn ddiweddarach, ym Mehefin 2023, mi oedd angen i fi fynd i’r ysbyty unwaith eto o ganlyniad i’r un broblem. Roedd y cyffuriau yn methu ac nid oedd un rhywbeth yn gweithio, felly’r ateb nesaf oedd llawdriniaeth gan fy mod i’n colli’r frwydr i’r clefyd. Chi’n gallu dychmygu, i ferch 18 mlwydd oed oedd ar fin dechrau yn y brifysgol, roedd e’n anodd clywed hyn ond roedd y llawdriniaeth a’r stoma yma yn mynd i achub fy mywyd. Mewn rhyw olau, mi oedd e’n beth da.
Bydde esbonio i chi be’ dydi stoma siŵr o fod yn le da i fynd nesaf! O ganlyniad i fy nghlefyd, mi oedd rhaid iddyn nhw dynnu fy ngholuddyn mawr allan a thynnu rhan o ‘ngholuddyn bach o fy mola fel bod popeth yn gallu dod mas y ffordd yna. Mae bag ‘da fi ar fy mola sydd yn gorchuddio’r stoma er mwyn i bopeth fynd i mewn iddo. Fi’n cofio pan o’n i ar fy ngwyliau, mi oeddwn i’n teimlo bach o bryder dros Astrid, y stoma (coeliwch chi fi, mae enwi’r stoma yn gwneud pethau lot yn haws!) ond weles i rywun gyda mewnblaniad clefyd y siwgr yn dangos gyda balchder, felly roedd hynny’n rhoi hyder i mi fod yn falch hefyd!
Roedd fy iechyd meddwl yn y dyddiau cynnar ar ôl y driniaeth yn iawn gan fy mod jyst eisiau fy mywyd ‘nôl! Ond, roedd yn hynod anodd yn gorfforol gan nad oeddwn i’n gallu gwneud llawer o bethau yn y dyddie cynnar yna. Ar ôl rhai misoedd, fe wnaeth e fwrw fi braidd mai dyma oedd fy mywyd i bellach, a dwi wedi crio llawer am y peth - mae fy nghariad i’n sicr yn dyst i’r holl grio! Er hyn, fe wnaeth y stoma achub fy mywyd ac mae’r ffordd o fyw sydd gennyf nawr shwt gymaint yn well!
Fy mhrif reswm dros rannu fy stori ar draws fy nghyfryngau cymdeithasol yw er mwyn cyfleu’r ffaith nad yw pob anabledd yn weladwy ac i addysgu pobl beth yw stoma ac IBD hefyd. Mae'n bwysig i mi i dorri’r ystrydebau a’r stigma sydd yn amgylchynu’r clefyd a’r driniaeth. Ar hyn o bryd, dwi’n codi arian ar gyfer Crohns and Colitis UK. Mae’n elusen sydd yn agos iawn at fy nghalon ac yn helpu pobl i gael diagnosis a chymorth gan ei fod yn gallu bod yn glefyd erchyll.
bottom of page