Haia gorjysys! <3 Ffraid dw i a fi ‘di sefydlydd SECS, platfform addysg rhyw newydd drwy gyfrwng y Gymraeg. Dw i ‘di bod isho cychwyn y cyfrif ers literally BLYNYDDOEDD, ond ces i gyfle o’r diwedd i’w wneud o eleni yn ystod blwyddyn olaf fy ngradd meddygaeth. Bwriad y platfform ydi rhannu cynnwys iechyd rhyw ac addysg rhyw mewn ffordd sy’n eitha ysgafn, hwyl a llafar ond sydd hefyd, gobeithio, yn addysgiadol ac yn helpu pobl.
 
Dwi wastad wedi meddwl ei bod hi’n ofnadwy o bwysig bod gan blant a phobl ifanc fynediad at wybodaeth gywir mewn perthynas ag addysg rhyw achos, let’s face it, mae ‘na lot o wybodaeth amheus allan yna ac yn aml iawn mae’n anodd deud y gwahaniaeth rhwng be’ sy’n wir a be’ sy’n gelwydd noeth. Yn sicr, mae na gyfrifoldeb ar rieni a gofalwyr i wneud hyn – ac mi o’n i’n ddigon lwcus i allu dweud unrhyw beth wrth Mam a Dad (er bo’ nhw ddim angen nac isho clywed rhai pethe!). Ond fel ’dan ni’n gwbod, dydi pawb ddim yn cael hynny adre, sy’n golygu bod ‘na lot o bwysau ar ysgolion, ac athrawon sy’n aml ddim yn arbenigo yn y maes, i wneud y cyfan. I ddweud y gwir, mae gwersi’n gallu cael eu cyflwyno mewn ffordd ychydig bach yn ffurfiol mewn ysgolion weithia’, felly mi o’n i’n meddwl y bysa fo’n syniad da trio cyflwyno’r pwnc mewn ffordd blaen ac agored dros y cyfryngau cymdeithasol.