top of page
Rysáit Cawl Cynnes
Mae ‘na rhywbeth reit reddfol am swatio ac ymddwyn yn unol â’r tymor, does? Digon teg, mae arafu yn ystod tymhorau tywyll ac oer y flwyddyn yn her y dyddiau yma - dydi peidio mynd i’r gwaith oherwydd amser y flwyddyn ddim yn esgus da, erbyn gweld! Ond, gyda’r gaeafau yn gwaethygu a El Nino bron yn gaddo tymor i’w gofio, rydym yn cael ein gorfodi i arafu, swatio a hyd yn oed celu adref rhag y stormydd.
Felly, os wyt ti’n cael dy orfodi i fochel adref yna mae’n rhaid meddwl am bethau i gadw’r hwyliau i fyny does? Pan fo’r sgrolio wedi dy ddiflasu a’r oerni yn dy fygwth, pa ffordd well o ddiddanu a chynhesu ‘na gyda chawl da?
Yr hyn sy’n wych am y rysáit yma ydi does fawr o bwys faint o’r cynnyrch sydd gen ti, felly does dim angen rhedeg allan i’r siop os wyt ti un moron yn brin! A phan fyddi di’n hen law ar y blas, fyddi di’n siŵr o allu ychwanegu neu dynnu cynhwysion fel y mynnat gyda chanlyniadau blasus a llesol!
Fyddi di angen:
• Pwmpen cnau menyn
• Tatw melys
• Moron
• Nionyn
• Garlleg
• Sinsir
• Hufen dwbl (opsiynol)
• Stoc llysiau
1. Paratoi’r llysiau a’u torri’n weddol fach. Rho’r cyfan mewn sosban fawr gydag ychydig o olew ar wres isel a gadael iddyn nhw chwysu am ychydig funudau. Fyddi di’n gwybod pan fyddant yn barod i’r cam nesaf gan ddefnyddio dy drwyn!
2. Ar ôl rhyw 10-15 munud, rho’r stoc llysiau a hufen i mewn gyda’r llysiau - digon i orchuddio’r llysiau i gyd.
3. Am ryw 20 munud, cadwa’r cawl ar ferw isel, hyd nes bod y llysiau yn feddal. Cofia ei gymysgu bob ychydig o funudau.
4. Pan fydd y llysiau yn feddal, mae’n amser ei gymysgu gyda phrosesydd bwyd.
5. Os ydi’r cawl yn rhy dew, yna ychwanegu ychydig o ddŵr neu hufen - mae’r cyfan i fyny i ti, sut bynnag wyt ti’n mwynhau cawl.
Os wyt ti’n rhoi cynnig ar y rysáit, rho wybod i ni!
bottom of page