Sut vibe y byddi di’n dilyn y Gwanwyn yma? Ymlaciol, llyfn, di-straen siŵr o fod? Wel, os wyt ti ffansi cerddoriaeth i gyd-fynd gyda dy gynlluniau ar gyfer gwneud y mwyaf o’r tywydd braf, yna hoffwn dy gyflwyno di i Lucy Borja!

Er megis mentro i fyd cyhoeddi ei cherddoriaeth ei hun mae Lucy, mae cerddoriaeth wedi bod yn rhan annatod o’i bywyd. “Dwi’n canu ers i mi gael fy ngeni! O wnes i ysgrifennu fy nghân gyntaf i tua 9 i 10 mlynedd yn ôl,” meddai.

Mae gan ei cherddoriaeth ei naws ei hun sydd yn ei gosod mewn categori unigryw iawn ar y sin miwsig yng Nghymru. Gyda Sage Todz yn ysbrydoliaeth a blynyddoedd o brofiad ysgrifennu ac arbrofi, mae Lucy wedi llwyddo i ddod o hyd i’w sain arbennig hi.

“Bydden i’n disgrifio fy steil o gerddoriaeth fel soulful R&B, alt-pop gyda bach o Latin infusion,” dywedai. “Mae fy steil wedi newid dros y blynyddoedd. Yn y dechrau wnes i ysgrifennu’r rhan fwyaf o’n nghaneuon ar y piano. Nawr, dwi’n defnyddio lot fwy o dechnoleg ac yn  defnyddio meddalwedd fel Logic Pro i chwarae gyda synau gwahanol er mwyn creu mwy o sain fodern a phop.”

​