top of page
Dal Tro'r Tymhorau
Beth yw dy hoff dymor di? Mae’n dewis anodd, dydi?! Mae bob tymor mor wahanol, o wres yr haf i ddathliadau’r gaeaf, gyda byd natur hefyd yn newid yn gyson. Nid dim ond y byd o’n cwmpas ni sy’n newid gyda’r tymhorau - rydym ni, hefyd, yn newid.
Wyt ti erioed wedi sylwi dy fod yn teimlo’n reit araf deg yn y gaeaf, gydag ysfa andwyol i swatio adref rhag y byd? Ac yn ystod tymhorau tywyll, rwyt ti’n dueddol o gysgu’n hwyrach a phan fo’r haul yn codi’n gynnar, rwyt ti hefyd yn codi’n gynt? Dy reddf naturiol di sy’n galw. Wedi’r cyfan, mae anifeiliaid o bob lliw yn newid gyda’r tymhorau - o adar sy’n ymfudo i gathod anwes sy’n cysgu drwy ddyddiau hir yr haf.
Y gwirionedd yw, mae’n annhebygol iawn y byddwn ni’n gallu ymroi’n llawn i’r syniad o symud gyda’r tymhorau. Wedi’r cyfan, dydi troi fyny i’w gwaith yn hwyr yn y gaeaf gan dy fod yn dilyn cyfarwyddiadau’r haul ddim yn esgus gwych... Ond, tybed gallwn ni ganolbwyntio ar y pethau bychain bob dydd?
1. Dilynwch yr haul drwy'r dydd
Os wyt ti’n eistedd mewn un man penodol drwy’r dydd er mwyn gweithio, byddi di’n siŵr o fod wedi laru. Ond mae un peth sy’n gwneud byd o les, sef golau dydd. Tra bod cymryd saib bob hyn a hyn er mwyn mynd allan am chwa o awyr iach yn syniad ardderchog, does dim rhaid i ti stopio’r llesiant yn fanna! Cer a dy waith er mwyn eistedd yn yr haul, neu yn yr ystafell fwyaf golau ar yr adeg honno. Mae hyn fel arfer yn golygu symud o gwmpas yn ystod y dydd, ond byddi di’n siŵr o deimlo’n buddion ar ôl y diwrnod cyntaf. Pwy a ŵyr, efallai y byddi di yn fwy cynhyrchiol, hyd yn oed?
2. Bwyta gyda’r tymhorau
Mae gan bob tymor ei lysiau ei hun, a phan fyddwch chi’n bwyta’r bwydydd cywir ar yr adeg gywir, mae popeth i’w weld yn gwneud synnwyr. Er enghraifft, wyt ti erioed wedi mwynhau mefus yn ei dymor, sef o fis Fehefin i fis Gorffennaf, a sylwi ar ba mor felys yw ei flas? Mae’r mefus yn tyfu’n naturiol ar yr adeg yma, ac mae’n rhoi blas tra gwahanol i fefus sy’n cael ei dyfu mewn amgylchiadau artiffisial ar adegau gwahanol o’r flwyddyn.
3. Gwrando ar dy gorff
Wyt ti’n teimlo dy hun yn arafu yn y prynhawn, yn arbennig yn yr haf? Gwranda ar dy gorff, trefna fore prysur o waith a cadwa’r tasgau mwy ymlaciol ar gyfer y prynhawn – os mai dyma mae dy gorff yn gofyn amdani! Weithiau, mae modd rhagweld sut y byddi di’n teimlo o flaen llaw, yn arbennig os oes gen ti gylch mislif cyson. Os felly, ceisia osgoi diwrnodau prysur ar y diwrnodau y byddi di’n rhagweld diwrnod diflas, neu os dydi hynny ddim yn bosib cadwa’r cyfres deledu yna o ti am wylio ar gyfer y diwrnodau ble nad oes hwyliau da arnat!
bottom of page