Aeth Lily i'r Eidal i ddilyn ei breuddwyd o weithio ym myd ffasiwn, gan astudio yn Ysgol Ffasiwn Polimoda. Yn ystod ei chyfnod yno, cafodd y cyfle i weithio ochr yn ochr â steilwyr proffesiynol mewn sioeau adnabyddus, gan gynnwys sioeau Diesel.

Yr hyn wnaeth i Lily sefyll allan oedd ei gwreiddiau Cymreig. Yn hytrach na dilyn pawb arall, fe wnaeth Lily gadw Cymru a'i threftadaeth yn agos i’w chalon a dyma oedd yr ysbrydoliaeth ar gyfer ei gwaith. Drwy gydol ei gradd, roedd tirweddau hardd Cymru yn dylanwadu ar ei gwaith, gan gymysgu'r elfennau hynny â ffasiwn fodern. 

Ers graddio, mae Lily bellach yn gweithio fel steilydd yn Mint Velvet. Yn ei hamser hamdden, mae hi hefyd yn dylunio ac yn creu dillad, gyda'r nod o lansio ei brand ffasiwn ei hun yn y dyfodol.

Fel steilydd, mae Lily'n treulio ei dyddiau yn helpu pobl i deimlo'n hyderus yn eu dillad. Felly, cyn siarad am beth sy'n trendio'r haf yma, roeddwn i eisiau gwybod beth yw'r cyngor steilio gorau y gallai hi ei roi.“Y peth cyntaf ydy gwybod beth sy'n gweithio i chi. Beth ydych chi eisiau i'ch gwisg ei ddweud amdanoch chi? Oes gennych chi steil mwy ‘streetwear’, rhywbeth cyfforddus, neu ydych chi'n hoffi look mwy chic a glam? Dyna le mae popeth yn dechrau,” eglurai.

Yn ôl Lily, mae lliw yn llawer pwysicach nag mae'r rhan fwyaf o bobl yn sylweddoli.